अन्तर्राष्ट्रीय समाचार

अफगानिस्तानको द्वन्द्वबारे राष्ट्रसंघले सार्वजनिक गर्यो यस्तो प्रतिवेदन

अफगानिस्तानको द्वन्द्वबारे राष्ट्रसंघले सार्वजनिक गर्यो यस्तो प्रतिवेदन

एजेन्सी– संयुक्त राष्ट्रसंघले अफगननिस्तानमा सन् २०१७ मा करिब २ हजार ३०० सर्वसाधारणको मृत्यु वा घाइते भएको जनाएको छ ।  संयुक्त राष्ट्रसंघले बिहीबार सार्वजनिक गरेको एक प्रतिवेदनमा सो तथ्य सार्वजनिक गरेको काबुलबाट प्राप्त समाचारमा जनाइएको छ । 

तालिवान र अन्य आतङ्ककारी समू्हले गरको आत्मघाती बम आक्रमणमा र हत्यामा ती सर्वसाधारण मारिएका संयुक्त राष्ट्रसंघद्धारा बिहीबार जारी विज्ञप्तिमा जानकारी दिइएको छ ।  यस्ता आक्रमणमा विशेषगरी महिला र बालबालिका धेरै परेका पनि सो विज्ञप्तिमा उल्लेख गरिएको छ ।  पछिल्ला केही वर्षको तुलनामा सन् २०१७ मा भएको मृत्यु र घाइतको यो संख्या बढी भएको सो प्रतिवेदनमा देखाइएको छ । तर यसअघिका वर्षहरुमा यो संख्या के कति थियो भन्ने बारेमा भने केही बताइएको छैन । 

सन् २०१७ मा भएका आत्मघाती आक्रमण र बजारलगायतका विभिन्न भवनमा भएको आक्रमण निकै क्रुर र अमानवीय रुपमा भएको पनि अफगानिस्तानका लागि संयुक्त राष्ट्रसंघको सहयोग मिसनले जनाएको छ । 

यस्ता आक्रमणहरुमा परी ६०५ सर्वसाधारणको मृत्यु भएको छ भने एक हजार ६९० जना घाइते भएका छन् ।  सन् २०१६ को तुलनामा सन् २०१७ मा २० प्रतिशतले सैनिक हताहत बढेको छ भने सात प्रतिशतले सर्वसाधारणको हताहत बढेको पनि सो प्रतिवेदनमा उल्लेख गरिएको छ । 

यद्यपी यसै वर्ष पनि गएको जनवरी २० यता भएका होटल आक्रमण, कयौं व्यक्ति जम्मा भएको स्थानमा लक्षित बम आक्रमण र सैनिक परिसरमा भएका आत्मघाती हमलामा परी १३० भन्दा बढी व्यक्तिको मृत्यु भएको छ ।  राष्ट्रसंघले यहाँ सर्वसाधारण र सुरक्षाकर्मीको मृत्युका घटनामा कमी नआएको निष्कर्ष निकालेको बताइएको छ ।  


News Tokha times

कमेन्ट