जिपिं थःगु भाषं ब्वने च्वय् मखंपिं

 २४ माघ २०६८, मंगलवार १०:२३   | न्यूज अफ टोखा

सुबिन्द्र श्रेष्ठ  खः जिपिं थःगु माँ भाषं ब्वने च्वय् मखंपिं । थःगु हे मौलिक भाषा अले तःताजि लिपि दयानं ब्वने च्वय् मखना च्वंपिं झी । आखिर छाय्ले छाय् थुकथं बञ्चित जुई माला च्वंगु झी ? थःगु माँ भाषं ब्वनेगु च्वय्गु जिमीगु अधिकार मखुला ? थुगु न्ह्यसः नेपाल भाषा न्ह्यलुवा धाःपिन्त न्यना च्वना । भाषा म्वाकेगु निति संघर्षरत सकल भाषा न्ह्यलुवा पिन्त न्यना च्वना । ‘‘छाय् जिपिं थःगु माँ भाषं आखः ब्वने च्वय् मखंगु?’’
थःगु माँ भाषं ब्वनेगु च्वय्गु छम्ह मचाया नैसर्गिक अधिकार मखुला ? तर छाय् थुगु अधिकार पाखे जिपि बञ्चित जुई माला च्वंगु । ‘‘भाषा म्वांसा जाति म्वाई’’ धाईगु खं यात हाकु तिना वान्छ्वया च्वनन भाषाया कार्यकर्ता निसे थुगु खँय चिउता तया च्वंपिं विभिन्न संघ संस्थादबुपुचःत भाषा म्वाकातयेगु धका छगु बन्दकोथाय् च्वना सःजक थ्वय्का च्वन छु थथे जक याना झीगु भाषा म्वना च्वनीला ? छुं हे ज्याहे मयाना हाजक हालानं झींगु भाषा ल्य्ना च्वनीला ?भाषा म्वाकेगु निति स्कुल स्तरं हे थःगु माँ भाय्या पाठ्यक्रम दय्का छ्यलेमाःगु मखुला? तर थुगु ज्या धाःसा ग्यसुलाक्क जुया च्वंगु खने मदु । थथे हे जुया च्वन धासा छंन्हु झीगु माँ भाय् ईतिहासया सफुइ जक सिमित जुईगु अवस्था वई । न्हुगु पुस्ता पिन्के थःगु माँ भाय् या प्रति चासो तना वनि । थथे हे जुया च्वन धासा छन्हु झीगु भाय्या सना(मलामि) झी वने मालिगु अवस्था वैगु निश्चय दु । 
थौं कन्हेया नेवाः मस्तय्सं बुलुहुँ बुलुहुँ नेवाः भाय् ल्हाय् त्वता वना च्वंगु दु । थः माँ अबुनं हे खय् भाय् स्यनेगु याना च्वंगु दु । छाय्ले छाय् थौं कन्हेया पिन्सं थः काय् म्ह्याय् पिन्त माँ भाय् मस्यंसें कतःया भाय् स्यना च्वनले ? थौं कन्हे झीगु माँ भाय्या महत्व म्ह्वं जुया वंगुलिं हे मस्तय्त कतःया भाय् स्यनेगु ज्याः जुया च्वंगु मखुला ? थगु माँ भाय् या खँग्वत थुइकेत तकं कतःया भाय्या बः कया थुइकेमाःगु अवस्था वया च्वंगु दु । थःगु नुगःया खँ तय्तनं कतःया भाय्या ग्वाहालि काय्माला च्वंगु दु । थ्व हे थःगु माँ भाय् ब्बने च्वय् मखंगुया लिच्व मखुला । यदि थुकथंहे जुया च्वंन धासा छन्हु झीगु नेपालःभाषा पक्का हे लोप जुया वनि । इलये हे सरोकार दुपिंनसं थुगु खँय विचाः मयासें मगाय् धुंकल थथे मयात धाःसा तधंगु क्षति जुईगु निश्चय हे खने दु ।



थःगु हे माँ भाषं ब्बने दय्मा धका कुतःनं याःगु खय् फु तर गुलिनं कुतः याना च्वंगु दु उगु कुतः मगानि । छगु निगु ब्वनेकुथि(स्कुल)ये ब्वंका जक थूगु समस्याया समाधान जुई मखु । थुकियात प्रत्येक नेवाः बस्ती बस्तिं अनिवार्य रुपं छगु निश्चित पाठ्यक्रम दय्का लागु याय्मा । उकिया लिस्लिसे स्यनेकुथि(इस्टिच्युट) व घुम्ती कक्षा संचालन याना नेपाल भाषा ब्वंकेगु ज्याय् तत्काल याय्मागु अवस्था खने दु । तर थुज्यागु ज्याःयाय् मफया च्वंगु दु ।

जिनं छम्ह नेवाः मचा ख । थःगु माँ भाय् प्रति तसकं मतिना दुम्ह । थःगु हे मां भाषं ब्वनेच्वय् यम्ह मचाजिं सःसां मसःसा थुगु च्वसु च्वया च्वना । धिसिलाक्क ग्यसुलाक्क ला च्वय् सम्हः मखु तरनं कुतः याना च्वना । छय् धासा जि थेंयाम्ह कयौं नेवाः मस्त दुथःगु माँ भाषं ब्वनेगु व च्वय्गु सयेके मास्ती वःपिं । तर गन वना सयेकेगु गन वना ब्वनेगु धका अन्योलय् लानां च्वंपिं यक्व हे दय्फु । न ब्वनेकुथिइ ब्वने खन नत कलेजे हे ब्वने खनथ्व हे मां भाषं ब्वने च्वय् मखँपि सकल नेवाः मस्तया सः प्रतिनिधि यासे थूगु च्वसु च्वयागु जुल । थुगु न्ह्यसया लिसः गनं न वै धका लं सोया च्वना भलसा काय्की थुगु न्ह्यसया लिसः सरोकारवालापिं पाखे वै धका ।
                                                                          ।।जय माँ भाय् ।।
थ्व च्वसु थौँया झीगु स्वनिग न्हिपौं खेय् पिदंगु खः।

Photobucket

प्रकाशित मितिः२०६८ माघ २४ गते मंगलबार
Facebook Comments

अन्तिम अपडेट: २४ माघ २०६८, मंगलवार १०:२३

न्यूज अफ टोखामा प्रकाशित कुनै समाचारमा तपाईंको गुनासो भए हामीलाई newsoftokha@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ ।  साथै हाम्रो  अनलाइन टिभी टोखा दर्शनका साथै हामीसँग तपाईं फेसबुक र ट्विटरमा पनि जोडिन सक्नुहुन्छ ।

 

तपाईको प्रतिक्रिया