आजदेखि लोडसेडिङ घट्यो (तालिकासहित)

 १ फाल्गुन २०६८, सोमबार १०:०७   | न्यूज अफ टोखा

काठमाडौं, फागुन १  – मध्यमर्स्याङदी जलविद्युत आयोजनाको मर्मत एक साता अघि नै पूरा भएपछि विद्युत प्राधिकरणले दैनिक लोडसेडिङलाई घटाएको छ। सातामा ८८ घण्टाको दरले हुँदै आएको लोडसेडिङ सोमबारदेखि ८१ घण्टामा झारिएको प्राधिकरणले जनाएको छ। साताका दुई दिन दैनिक १४ घण्टाको लोडसेडिङलाई अब १३ घण्टामात्र गर्ने गरी प्राधिकरणले कार्यतालिका सार्वजनिक गरेको छ।
अब दैनिक कम्तिमा १० र बढीमा १३ घण्टासम्ममात्र लोडसेडिङ हुनेछ। प्राधिकरणको लोडसेडिङ तालिका अनुसार सातामा दुई दिन १३ घण्टा, एक दिन १२ घण्टा, दुई दिन ११ घण्टा र बाँकी दुई दिन १० घण्टाका दरले बत्ती जानेछ। 

दैनिक १३ घण्टा लोडसेडिङ भएको दिनमा समेत बिहान र रातिको समयमा अधिकांश उपभोक्ताले बिजुली बत्ति बाल्न पाउने छैनन्। बिहान र रातिको ‘पिक आवर’ मा लोडसेडिङ हुनेछ।

गत पुस ३ देखि सुरु गरेको १४ घण्टाको लोडसेडिङलाई अहिले घटाइएको हो। कुलेखानी आयोजनामा अझै पनि पानी प्रयाप्त रहेको र मध्यमर्स्याङदीको मर्मत समेत पुरा भएकोले लोडसेडिङ घटेको हो।

बढी बिजुली चुहावट हुने स्थानहरुमा थप ५ घण्टा लोडसेडिङ हुने प्राधिकरणले जनाएको छ। ५० प्रतिशत चुहावट हुने स्थानमा थप दुई घण्टा, ६० प्रतिशत हुने स्थानमा तीन घण्टा, ७० प्रतिशत चुहावट भएको स्थानमा ४ घण्टा र ७० प्रतिशत भन्दा बढी चुहावट भएका स्थानमा थप ५ घण्टा लोडसेडिङ हुनेछ। प्राधिकरण स्रोतका अनुसार तराईका जिल्लाहरुमा ८५ प्रतिशत सम्म चुहावट छ।

प्राधिकरणका अनुसार यस वर्षको सबैभन्दा बढी लोडसेडिङनै साताको ८८ घण्टानै सबैभन्दा उच्च रहने संभावना छ। फागुनसँगै गर्मी बढेर नदीमा पानी बढ्ने भएकोले
बिजुली उत्पादन बढ्दै जान्छ। प्राधिकरणले गत वर्षजस्तै यो वर्ष पनि दैनिक लोडसेडिङ १४ घण्टामै सिमित गर्ने लक्ष्य लिएको थियो।

चोरी नियन्त्रणमा गरिएको कडाई, भारतबाट बिजुली आयात गरिएको, मल्टिफ्यूल प्लान्टहरु सञ्चालन गरिएकोले लोडसेडिङ घटेको हो।

Facebook Comments

अन्तिम अपडेट: १ फाल्गुन २०६८, सोमबार १०:०७

न्यूज अफ टोखामा प्रकाशित कुनै समाचारमा तपाईंको गुनासो भए हामीलाई newsoftokha@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ ।  साथै हाम्रो  अनलाइन टिभी टोखा दर्शनका साथै हामीसँग तपाईं फेसबुक र ट्विटरमा पनि जोडिन सक्नुहुन्छ ।

 

तपाईको प्रतिक्रिया