नेवाःतय् ऐतिहासिक जनप्रदर्शन

 ७ जेष्ठ २०६९, आईतवार ०२:२९   | न्यूज अफ टोखा

नेवाः स्वायत्त राज्यया माग यासें नेवाःतय्सं शनिवाः विशाल जन प्रदर्शन यात । स्वनिगःया थीथी लागाया द्वलंद्वः मनूतय्सं उगु बृहत्त जनप्रदर्शनय् ब्वति कयाः नेवाः शक्ति प्रदर्शन याःगु खः । चकंदबु छगुलिं जाःगु सभाय् नेवाः नेतात नापं जनजाति व मधेशी सभासद्तय्सं नं सम्बोधन यानादीगु खः ।

सभायात सम्बोधन यासें नेवाः सभासद्त हितमान शाक्य, मंगलसिद्धि मानन्धर, हिसिला यमि, दिलिप महर्जन, बुद्ध साय्मि व राजकाजि महर्जनं जेठ १४ गते तकया न्हि झीगु लागिं ऐतिहासिक जुइगु जूगुलिं फुक्कं नेवाःत छथय् मुनाः नेवाः राज्य प्राप्तिया निंतिं महत्वपूर्ण भूमिका म्हिते माःगु धयादिल ।

नेवाः स्वायत्त राज्य मंकाः संघर्ष समितिया नायः बाबुराजा बज्राचार्यया सभापतित्वय् जूगु सभाय् सभासदतय्सं पहिचान मदुगु संविधान व नेवाः राज्य मदुगु संघीयता स्वीकार यायेमफइगु धासें यदि अज्याःगु संविधान वःसा थःपिंसं उकी हस्ताक्षर मयायेगु प्रतिबद्धता प्वंकूगु खः ।

सभाय् बृहत मधेशी मोर्चाया संयोजक नापं मधेशी जनअधिकार फोरम नेपालया नायः उपेन्द्र यादवं नेवाः भूमिइ नेवाः राज्य दयेमाःगु मधेशी समुदायया नं चाहना जूगु धयादिल ।

संयुक्त लोकतान्त्रिक मधेशी मोर्चाया लक्ष्मणलाल कर्णं जेठ १४य् पहिचान बिनाया संविधान जारी जूसाः जेठ १५ गते निसें नेवाःतय्सं नेवाः राज्यं, मधेशीतय्सं मधेशं व मेमेगू समुदायं थःथःगु थासं आन्दोलन याइगु धयादिल ।

आदिवासी जनजाति संयुक्त लोकतान्त्रिक मोर्चाया संयोजक सुरेश आले मगरं ब्रम्हु क्षेत्रीत नं समाजय् उत्पिडित जूसां इमिगु उत्पिडन जातिय मखसें व्यतिगत जक जूगु धयादिसें खस ब्रम्हुतय्त आदिवासीइ सुचिकृत यायेगु सरकारकया निर्णय प्रति असहमति प्वंकादिल ।

नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं छुं नं समुदाययात आदिवासी सूचिकृत यायेगु धइगु मन्त्रीया खल्तिं लिकया मखसें अन्तर्राष्ट्रिय मापदण्ड कथं जुइमाःगु न्ह्यथनादिसें जेठ १४य् नेवाः राज्य दुगु संविधान मवःसा सिंहदरवार व संविधानसभा भवन नेवाःतय्सं कब्जा याइगु धयादिल ।

सभाय् ज्यापु समाज यलया न्वकु मंगल महर्जनं लसकुस यानादीगु खःसा नेवाः ल्याम्ह न्ह्यलुवाःया नायः नरेशवीर शाक्यं नं न्ववानादीगु खः ।

सभा स्वयां न्ह्यः येँ, यल, ख्वप, किपु, तोखा, थानकोट लगायत आपलं थासं जुलुस सहित ब्वति काःगु खः ।
(nepalmandal.com)

Facebook Comments

अन्तिम अपडेट: ७ जेष्ठ २०६९, आईतवार ०२:२९

न्यूज अफ टोखामा प्रकाशित कुनै समाचारमा तपाईंको गुनासो भए हामीलाई newsoftokha@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ ।  साथै हाम्रो  अनलाइन टिभी टोखा दर्शनका साथै हामीसँग तपाईं फेसबुक र ट्विटरमा पनि जोडिन सक्नुहुन्छ ।

 

तपाईको प्रतिक्रिया