ओलीलाई सडकबाटै परास्त गर्ने प्रचण्ड–माधव पक्षको उद्घोष, सडकमा आउन निम्ता !

 ९ माघ २०७७, शुक्रबार १८:४८   | न्यूज अफ टोखा

काठमाडौं । प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गरेको विरोधमा नेपाल कम्युनिस्ट पार्टी (नेकपा) प्रचण्ड माधव पक्षले काठमाडौँमा शक्ति प्रदर्शन गरेको छ ।

दोस्रो चरणको आन्दोलनमा रहेको प्रचण्ड–माधव पक्षले शुक्रबार उपत्यकाका विभिन्न नौ स्थानबाट हजारौँको संख्यामा आफ्ना नेता कार्यकर्ता भेला गरेर काठमाडौँको भृकुटीमण्डपमा विशाल सभासमेत गरेको छ ।

सभालाई सम्बोधन गर्दै अध्यक्षद्वय पुष्पकमल दाहाल ‘प्रचण्ड’ माधवकुमार नेपाल, वरिष्ठ नेता झलनाथ खनाल र नेता घनश्याम भुषालले सम्बोधन गर्दै जनताको बलमा ओलीको प्रतिगामी कदम परास्त गरेरै छाड्ने दाबी गरे । उनीहरुले केपी ओलीको संविधान, संघीय लोकतान्त्रिक गणतन्त्र र संसदबिरुद्धको प्रहारबाट जोगाउन संघर्षको विकल्प नभएको बताए ।

सभालाई सम्बोधन गर्दै अध्यक्ष प्रचण्डले संविधान, संघीय लोकतान्त्रिक गणतन्त्रका पक्षमा फेरि एकजुट भएर लड्नुपर्ने समय आएको बताए । परिवर्तनकारी शक्तिहरु मिलेर प्रतिगमनकारीहरुलाई परास्त गर्नुपर्ने उनको भनाइ थियो ।

सम्बोधनका क्रममा प्रचण्डले प्रधानमन्त्री ओलीले प्रतिनिधिसभामात्र नभइ यो संविधान र शान्ति प्रक्रियालाई नै विघटन गर्न खोजेको भन्दै उनको निरंकुश र स्वेच्छाचारी कदमलाई सही थाप्दा देश बर्बादीतर्फ जाने भएकाले जनतामा जानुको विकल्प नभएको बताए ।

उनले प्रतिनिधिसभा र प्रदेशसभा निर्वाचन अघि वाम गठबन्धन बनाएर झण्डै दुई तिहाइ बहुमत हासिल गरेपछि देशको आर्थिक विकासमा केन्द्रीत हुने गरी पार्टी एकता गरिएपनि ओलीका गलत कृयाकलाप र स्वेच्छाचारी प्रवृत्तिले मुलुक उल्टो दिशामा गएको स्वीकार गरे ।

‘हामीले तीन वर्षमा पनि केपीलाई तह लगाउन सकेनौँ,’ उनले भने, ‘उहाँका केही कुरा मानिदिएर पार्टी पनि बचाउन सकिन्छ कि भनेर प्रयास गरेको हो तर केपीका गलत प्रवृत्तिविरुद्ध कडा तरिकाले संघर्ष गर्न सक्नुपर्थ्यो, हामीले गर्न सकेनौँ, यसमा म तपाईंहरुसामु आत्मालोचना गर्छु ।’

प्रचण्डले ओली प्रवृतिको चर्को विरोध गर्दै ओलीमा पनि राजा महाराजा प्रवृति देखिएकाले त्यस्तो प्रवृतिलाई जनताले परास्त गरेरै छोड्ने विश्वास व्यक्त गरे । ‘नेपाली जनताले तानाशाहलाई घुँडा टेकाएर फुटबल खेल्न सक्छन्, राजा महाराजाका श्रीपेच झिकेर लात्ताले हान्न सक्छन् भन्ने प्रमाणित भइसकेको छ,’ प्रचण्डको भनाइ छ ।

त्यस्तै अर्का अध्यक्ष माधवकुमार नेपालले फेरि ओलीसँग मिल्छन् कि भनेर अन्य पार्टीहरुले आशंका गरेपनि त्यो सम्भावना नरहेको बताए । उनले सिंगो देश ओलीका विरुद्ध रहेको भन्दै ओलीसँग अरिङ्गाल र साइबर सेना मात्रै रहेको दावी गरे । ‘ओलीको विरुद्धमा सिंगो देश उभिएको छ । ओलीको पक्षमा साइवर सेना र अरिंगालमात्रै छन् । हाम्रो विशाल पार्टीसँग ओलीका अरिंगाल र साइबर सेनाले लड्ने क्षमता राख्दैनन्’ अध्यक्ष नेपालको भनाइ छ । उनले ओलीसँग मिल्छन् कि भन्ने आंशकाको पनि खण्डन गरे । ‘अहिले कतिपय पार्टीले शंका गरेका छन् । यो कुनै नाटक गरेका त छैनन् ? कतै मिल्ने त हैनन् ? कतै हामीलाई धोका त दिने हैनन् ? हामी मूल्यको राजनीति गर्छौँ । हामी विचारको राजनीति गर्छौँ,’ नेपालको भनाइ छ ।

अध्यक्ष नेपालले ओलीले ५० वर्षसम्म दुःख मात्रै दिएको गुनासो पनि गरे । ‘ओलीले ५० वर्षसम्म हैरान पारे, दुःखमात्रै दिए । पार्टी एकता गरेपछि केपी ओली सुध्रिन्छन् कि भन्ने सोच्यौँ तर भएन,’ नेपालले भने ।

सभालाई सम्बोधन गर्दै वरिष्ठ नेता झलनाथ खनालले आधिकारिक नेकपा प्रचण्ड–माधवले नेतृत्व गरेको पार्टी नै भएको भन्दै त्यसका लागि जनता को सँग छन् भन्ने हेर्न सडकमा आउन निम्ता दिए ।

‘म केपी ओलीलाई कुन पार्टी आधिकारिक हो भन्ने कुरा सडकमा आएर हेर्न निम्ता गर्न चाहन्छु’, नेता खनालले चेतावनी दिए । उनले ओलीको प्रतिगामी कदम नसच्चिएसम्म आन्दोलन नरोकिने भन्दै ओलीलाई कम्युनिस्ट आन्दोलनका घातका तत्व भएको टिप्पणी गरे ।

सभामा सम्बोधनको सुरुवात गर्दै नेता घनश्याम भुषालले प्रधानमन्त्री केपी शर्मा ओलीको सेटिङले देश नचल्ने बताए ।

उनले सबैतिर ओलीले सेटिङ मिलाएको भनेर सुन्ने गरेको भन्दै ओलीको सेटिङ र जालझेल सफल नहुने दावी गरे ।

‘ओलीका जालझेल र षड्यन्त्रलाई कुनै हालतमा पूरा हुन दिइनेछैन । सेटिङले देश चल्दैन, सेटिङ त जासुसी उपन्यासहरुमा मात्र सफल हुन्छ’,भुषालले भने, ‘२१औं शताब्दीमा सेटिङमा अदालतलाई दबाउन सकिन्छ भन्ने भ्रम पाल्नु भएको छ भने कमरेड ओली तपाईंले गलत गर्दै हुनुहुन्छ  भोलि पराजित हुनुहुनेछ ।’

प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गरेपछि नेकपा नेपाल कम्युनिस्ट पार्टी (नेकपा) राजनीतिक र व्यवहारिक रुपमा विभाजित छ ।

प्रधानमन्त्री समेत रहेका ओलीले एक पक्ष नेकपाको नेतृत्व गरिरहेका छन् भने अर्को पक्षको पुष्पकमल दाहाल ‘प्रचण्ड’ र माधवकुमार नेपालहरुले गरेका छन् । ‘ओली प्रवृति’का विरुद्ध आन्दोलनमा होमिएको प्रचण्ड–माधव पक्षले ओलीलाई पार्टीबाट कारवाही समेत गरिसकेको छ । उनलाई नेकपाको साधारण सदस्यसमेत नरहने गरी निस्कासन गर्ने अध्यक्ष माधव कुमार नेपालले पटक पटक बताइसकेका छन् ।

नेताहरुले ओलीबिनाकै नेकपा बनाउने घोषणा गरेको अवस्थामा अवको नेकपा चाही कस्तो होला त ? के यी नेताहरुले आफु सत्ता र शक्तिमा पुगेपछि विचार, सिद्धान्त र नीति तथा कार्यक्रमलाई एकातिर पनछाएर ओली प्रवृति देखाउदैनन् भन्ने के ग्यारेण्टी छ ? अहिले उठेको आम प्रश्न यही हो । यो प्रश्न आम जनताबाट उठेकैले हुनसक्छ–प्रचण्ड नेपाल पक्षका नेताहरुले अबको नेकपा माक्र्सवादी सिद्धान्तमा आधारित समाजवादको दिशा पक्रने पार्टी बनाउने दावी पनि गरिरहेका छन् । ओलीको प्रतिगामी, अलोकतान्त्रिक र असंवैधानिक कदम सच्चाउँदै संसदको पुर्नस्थापना गरेर अबको नेकपा सिद्धान्त र विचारमा आधारित पार्टी बनाउने विरोधी नेताहरुले बताएका छन् । #रातोपाटीबाट

Facebook Comments

अन्तिम अपडेट: ९ माघ २०७७, शुक्रबार १८:४८

न्यूज अफ टोखामा प्रकाशित कुनै समाचारमा तपाईंको गुनासो भए हामीलाई newsoftokha@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ ।  साथै हाम्रो  अनलाइन टिभी टोखा दर्शनका साथै हामीसँग तपाईं फेसबुक र ट्विटरमा पनि जोडिन सक्नुहुन्छ ।

 

तपाईको प्रतिक्रिया